ಭಾನುವಾರ, ನವೆಂಬರ್ 29, 2015

Bellada panaka in Kannada | ಬೆಲ್ಲದ ಪಾನಕ


ಬೆಲ್ಲದ ಪಾನಕ ಮಾಡುವ ವಿಧಾನ 

ಬೆಲ್ಲದ ಪಾನಕವನ್ನು ಸಾಧಾರಣವಾಗಿ ಶ್ರೀರಾಮನ ಜನ್ಮದಿನವಾದ ರಾಮನವಮಿ ಯಂದು ತಯಾರಿಸಿ ಕೋಸಂಬರಿ ಯೊಂದಿಗೆ ಹಂಚುತ್ತಾರೆ. ಈ ಪಾನಕದಲ್ಲಿ ಬೆಲ್ಲ ಮತ್ತು ಕಾಳು ಮೆಣಸು ಸಾಮಾನ್ಯ ಪದಾರ್ಥಗಳಾಗಿದ್ದು, ಜೊತೆಗೆ ಶುಂಠಿ ಅಥವಾ ಹುಣಿಸೆ ರಸ ಅಥವಾ ನಿಂಬೆ ಹಣ್ಣಿನ ರಸ ಸೇರಿಸುತ್ತಾರೆ. ಇಲ್ಲಿ ಎರಡು ವಿಧವಾದ ಪಾನಕವನ್ನು ವಿವರಿಸಲಾಗಿದೆ. ನಿಮ್ಮ ರುಚಿಗೆ ತಕ್ಕಂತೆ ಪದಾರ್ಥಗಳನ್ನು ಬದಲಾಯಿಸಲು ಬಹುದು. ಬೆಲ್ಲದಲ್ಲಿ ಕಬ್ಬಿಣ ಸತ್ವ ಇದ್ದು ಬಹಳ ಆರೋಗ್ಯಕರವಾಗಿದೆ. ಈ ಪಾನಕ ಜೀರ್ಣಕ್ಕೆ ಬಹಳ ಒಳ್ಳೆಯದು.ಇದರ ತಯಾರಿ ಸರಳವಾಗಿದ್ದು, ಕಡಿಮೆ ಸಮಯದಲ್ಲಿ ತಯಾರಿಸಬಹುದು.


ತಯಾರಿ ಸಮಯ: 10 ನಿಮಿಷ
ಅಡುಗೆ ಸಮಯ : 0 ನಿಮಿಷ
ಪ್ರಮಾಣ: 1 ಕಪ್

ಬೇಕಾಗುವ ಪದಾರ್ಥಗಳು (ವಿಧಾನ 1):( ಅಳತೆ ಕಪ್ = 240 ಎಂಎಲ್ )

  1. 1 ಕಪ್ ನೀರು
  2. ದೊಡ್ಡ ಚಿಟಿಕೆ ಒಣಶುಂಠಿ ಪುಡಿ ಅಥವಾ 1/4 ಟಿಸ್ಪೂನ್ ಜಜ್ಜಿದ ಶುಂಠಿ 
  3. 1 ಟೇಬಲ್ ಚಮಚ ಪುಡಿ ಮಾಡಿದ ಬೆಲ್ಲ
  4. ಒಂದು ಚಿಟಿಕೆ ಕಾಳು ಮೆಣಸು ಪುಡಿಮಾಡಿದ್ದು (ಬೇಕಾದಲ್ಲಿ)
  5. 1 ಟೀಸ್ಪೂನ್ ನಿಂಬೆ ಹಣ್ಣಿನ ರಸ
  6. ಒಂದು ಸಣ್ಣ ಚಿಟಿಕೆ ಏಲಕ್ಕಿ ಪುಡಿ

ಬೇಕಾಗುವ ಪದಾರ್ಥಗಳು (ವಿಧಾನ 2):( ಅಳತೆ ಕಪ್ = 240 ಎಂಎಲ್ )

  1. 1 ಕಪ್ ನೀರು
  2. 1 ಟೇಬಲ್ ಚಮಚ ಪುಡಿ ಮಾಡಿದ ಬೆಲ್ಲ
  3. ಒಂದು ಚಿಟಿಕೆ ಕಾಳು ಮೆಣಸು ಪುಡಿಮಾಡಿದ್ದು
  4. 1 ಗೋಲಿ ಗಾತ್ರದ ಹುಣಿಸೆ ಹಣ್ಣು
  5. ಒಂದು ಸಣ್ಣ ಚಿಟಿಕೆ ಏಲಕ್ಕಿ ಪುಡಿ

ಬೆಲ್ಲದ ಪಾನಕ ಮಾಡುವ ವಿಧಾನ (ವಿಧಾನ 1):

  1. 1 ಕಪ್ ನೀರು ತೆಗೆದುಕೊಂಡು, ಶುಂಠಿ, ಪುಡಿಮಾಡಿದ ಬೆಲ್ಲ, ಪುಡಿಮಾಡಿದ ಕಾಳು ಮೆಣಸು, ನಿಂಬೆ ರಸ, ಏಲಕ್ಕಿ ಪುಡಿ ಹಾಕಿ ಬೆರೆಸಿ. 10 ನಿಮಿಷ ಹಾಗೆ ಬಿಟ್ಟು, ಕುಡಿಯಲು ಕೊಡಿ.

ಬೆಲ್ಲದ ಪಾನಕ ಮಾಡುವ ವಿಧಾನ (ವಿಧಾನ 2):

  1. ಹುಣಿಸೆಹಣ್ಣು ನೆನೆಸಿ, ರಸ ತೆಗೆದಿಟ್ಟು ಕೊಳ್ಳಿ. 1 ಕಪ್ ನೀರು ತೆಗೆದುಕೊಂಡು, ಹುಣಿಸೆ ರಸ, ಪುಡಿಮಾಡಿದ ಬೆಲ್ಲ, ಪುಡಿಮಾಡಿದ ಕಾಳು ಮೆಣಸು, ಏಲಕ್ಕಿ ಹಾಕಿ ಬೆರೆಸಿ. 10 ನಿಮಿಷಗಳ ಕಾಲ ಹಾಗೆ ಬಿಟ್ಟು, ಕುಡಿಯಲು ಕೊಡಿ.

Brahmi - Thimare - Ondelaga chutney in kannada | ಬ್ರಾಹ್ಮಿ ಚಟ್ನಿ



ಬ್ರಾಹ್ಮಿ ಅಥವಾ ತಿಮರೆ ಅಥವಾ ಒಂದೆಲಗ ಚಟ್ನಿ ಮಾಡುವ ವಿಧಾನ 


ಬ್ರಾಹ್ಮಿ ಅಥವಾ ಒಂದೆಲಗ ಅಥವಾ ತಿಮರೆ ಒಂದು ಔಷಧೀಯ ಸಸ್ಯವಾಗಿದ್ದು ಹಲವಾರು ಆರೋಗ್ಯಕರ ಅಂಶಗಳನ್ನು ಹೊಂದಿದೆ. ಬ್ರಾಹ್ಮಿ ಸೊಪ್ಪನ್ನು ಉಪಯೋಗಿಸಿ ಮಾಡುವ ಕೆಲವು ಅಡುಗೆಗಳಿದ್ದು, ಅದರಲ್ಲಿ ಈ ಚಟ್ನೀ ಒಂದಾಗಿದೆ. ಈ ಚಟ್ನಿ ಮಾಡಲು ಸುಲಭ ಹಾಗೂ ಬಹಳ ರುಚಿಯಾಗಿರುತ್ತದೆ.

ಆಯುರ್ವೇದ ಪ್ರಕಾರ ಬ್ರಾಹ್ಮಿ ಆತಂಕ, ನರವ್ಯಾಧಿ ಮತ್ತು ಮಾನಸಿಕ ಆಯಾಸ ಚಿಕಿತ್ಸೆಯಲ್ಲಿ ಬಹಳ ಪ್ರಯೋಜನಕಾರಿಯಾಗಿದೆ. ಬ್ರಾಹ್ಮಿ ಐಕ್ಯೂ, ಹಾಗೂ ಮಕ್ಕಳಲ್ಲಿ ಮಾನಸಿಕ ಏಕಾಗ್ರತೆ ಉತ್ತಮಗೊಳಿಸಲು ಅತ್ಯಂತ ಸಹಕಾರಿಯಾಗಿದೆ. ಬ್ರಾಹ್ಮಿ ಮಾನಸಿಕ ಸ್ಪಷ್ಟತೆ ಮತ್ತು ಆತ್ಮ ವಿಶ್ವಾಸ ಹೆಚ್ಚಿಸಲು ಸಹಕಾರಿಯಾಗಿದೆ. ಬ್ರಾಹ್ಮಿ ಅಪಸ್ಮಾರ , ನಿದ್ರಾಹೀನತೆ, ಅಸ್ತಮಾ ಮತ್ತು ಸಂಧಿವಾತ ಗಳ ಚಿಕಿತ್ಸೆಯಲ್ಲಿ ಫಲಕಾರಿಯಾಗಿದೆ. ಬ್ರಾಹ್ಮಿಯಲ್ಲಿ ರೋಗ ನಿರೋಧಕ ಶಕ್ತಿ ಇದ್ದು ಕ್ಯಾನ್ಸರ್ ನಂತಹ ಖಾಯಿಲೆಗಳನ್ನು ತಡೆಯಬಲ್ಲದು. ಅಲ್ಲದೆ ಆಸ್ತಮಾ, ಸಂಧಿವಾತ, ಬೆನ್ನು ನೋವು, ಮಲಬದ್ಧತೆ, ಕೂದಲು ಉದುರುವಿಕೆ, ಜ್ವರ, ಅಜೀರ್ಣ ಮುಂತಾದ ಸಮಸೈಗಳ ವಿರುದ್ಧ ಪರಿಣಾಮಕಾರಿಯಾಗಿದೆ. ಚರ್ಮದ ಸಮಸ್ಯೆಗಳನ್ನು ಪರಿಹರಿಸಲು ಬಳಸಲಾಗುತ್ತದೆ. ಬ್ರಾಹ್ಮಿ ಬುದ್ಧಿಶಕ್ತಿ ಹೆಚ್ಚಿಸುತ್ತದೆ ಮತ್ತು ಮನಸ್ಸಿಗೆ ವಿಶ್ರಾಂತಿ ನೀಡುತ್ತದೆ ಎಂದು ಹೇಳುತ್ತಾರೆ.

ಬ್ರಾಹ್ಮೀ ಚಟ್ನಿ ವಿಡಿಯೋ


ತಯಾರಿ ಸಮಯ: 10 ನಿಮಿಷ
ಅಡುಗೆ ಸಮಯ : 5 ನಿಮಿಷ
ಪ್ರಮಾಣ : 2 ಜನರಿಗೆ

ಪದಾರ್ಥಗಳು: ( ಅಳತೆ ಕಪ್ = 120 ಎಂಎಲ್ )

  1. ಎರಡು ಹಿಡಿ ಬ್ರಾಹ್ಮಿ ಎಲೆ
  2. 1/2 ಕಪ್ ತೆಂಗಿನ ತುರಿ
  3. 1/3 ಬೆರಳುದ್ದ ಶುಂಠಿ
  4. 2 ಒಣ ಮೆಣಸಿನಕಾಯಿ
  5. 1/2 ನೆಲ್ಲಿಕಾಯಿ ಗಾತ್ರ ಹುಣಿಸೆ ಹಣ್ಣು
  6. 1/2 ನೆಲ್ಲಿಕಾಯಿ ಗಾತ್ರ ಬೆಲ್ಲ
  7. ಉಪ್ಪು ರುಚಿಗೆ ತಕ್ಕಷ್ಟು.

ಒಗ್ಗರಣೆಗೆ ಬೇಕಾಗುವ ಪದಾರ್ಥಗಳು:

  1. 1/2 ಒಣ ಮೆಣಸಿನಕಾಯಿ
  2. 1/4 ಟೀಸ್ಪೂನ್ ಸಾಸಿವೆ
  3. 1 ಟೀಸ್ಪೂನ್ ಅಡುಗೆ ಎಣ್ಣೆ

ಬ್ರಾಹ್ಮಿ ಚಟ್ನಿ ಮಾಡುವ ವಿಧಾನ:

  1. ಮೊದಲಿಗೆ ಬ್ರಾಹ್ಮಿ ಎಲೆಗಳನ್ನು ಆಯ್ದು, ತೊಳೆಯಿರಿ. ನಂತರ ಅರೆಯಲು ಬೇಕಾದ ಎಲ್ಲ ಪದಾರ್ಥಗಳನ್ನು ಸಿದ್ಧವಾಗಿಟ್ಟುಕೊಳ್ಳಿ.
  2. ಸಿದ್ಧ ಮಾಡಿಟ್ಟುಕೊಂಡ ಎಲ್ಲ ಪದಾರ್ಥಗಳನ್ನು ಮಿಕ್ಸಿ ಜಾರಿಗೆ ಹಾಕಿ, ಸ್ವಲ್ಪ ನೀರು ಸೇರಿಸಿ ಅರೆಯಿರಿ.
  3. ಸಾಸಿವೆ ಮತ್ತು ಒಣ ಮೆಣಸಿನ ಒಗ್ಗರಣೆ ಕೊಡಿ. ಈ ಚಟ್ನಿ ಅನ್ನದೊಂದಿಗೆ ತಿನ್ನಲು ಬಲು ರುಚಿ.

ಶನಿವಾರ, ನವೆಂಬರ್ 28, 2015

Maddur vade in Kannada | ಮದ್ದೂರ್ ವಡೆ

ಮದ್ದೂರ್ ವಡೆ ಮಾಡುವ ವಿಧಾನ 

ಮದ್ದೂರ್ ವಡೆ ಕರ್ನಾಟಕದ ಜನಪ್ರಿಯ ಖಾದ್ಯವಾಗಿದೆ. ಮದ್ದೂರ್ ಮಂಡ್ಯದ ಬಳಿ ಇರುವ ಸಣ್ಣ ಪಟ್ಟಣವಾಗಿದ್ದು, ಮೈಸೂರು - ಬೆಂಗಳೂರು ರಾಜ್ಯ ಹೆದ್ದಾರಿಯಲ್ಲಿ ಕಾಣ ಸಿಗುತ್ತದೆ. ಈ ಖಾದ್ಯ ಮದ್ದೂರಿನಲ್ಲಿ ಹುಟ್ಟಿರುವ ಕಾರಣ ಇದನ್ನು ಮದ್ದೂರ್ ವಡೆ ಎಂದು ಕರೆಯಲಾಗುತ್ತದೆ. ಬಹಳ ರುಚಿಕರವಾಗಿರುವ ಈ ಅಡುಗೆಯನ್ನು ನೀವು ಒಮ್ಮೆ ಮಾಡಿದಲ್ಲಿ ಪುನಃ ಮಾಡಲು ಇಚ್ಚಿಸುತ್ತೀರಿ.
ನೀವು ಬೆಂಗಳೂರು ಮತ್ತು ಮೈಸೂರು ನಡುವೆ ಟ್ರೈನ್ ಅಥವಾ ಬಸ್ ನಲ್ಲಿ ಪ್ರಯಾಣಿಸಿದರೆ, ಮದ್ದೂರು ಬಂದಾಗ ಅಲ್ಲಿ ಬಕೆಟ್ ಗಳಲ್ಲಿ ಮದ್ದೂರ್ ವಡೆಯನ್ನು ಮಾರುತ್ತಾ ಬರುವವರು ಕಾಣಸಿಗುತ್ತಾರೆ. ದೊಡ್ಡವರು ಚಿಕ್ಕವರೆನ್ನದೆ ಎಲ್ಲರೂ ಈ ವಡೆಗಳಿಗೋಸ್ಕರ ಕಾಯುತ್ತಾರೆ. ನಾನು ಮೊಟ್ಟ ಮೊದಲ ಸಲ ಈ ವಡೆಯನ್ನು ಸವಿದಿದ್ದು ಮೈಸೂರಿನಿಂದ ಬೆಂಗಳೂರಿಗೆ ಪ್ರಯಾಣಿಸುವಾಗಲೇ.
ಮದ್ದೂರು ವಡೆ ಹೊರಗಿನಿಂದ ಗಟ್ಟಿಯಾಗಿ ಕಾಣಿಸಿದರೂ, ಒಳಗಿನಿಂದ ಮೃದುವಾಗಿರುತ್ತದೆ. ನೀರುಳ್ಳಿಯ ಸ್ವಾದ ವಡೆಯ ರುಚಿಯನ್ನು ಹೆಚ್ಚಿಸುತ್ತದೆ. ಈ ವಡೆಯನ್ನು ಮೈದಾ ಹಿಟ್ಟು, ಅಕ್ಕಿ ಹಿಟ್ಟು, ರವೆ ಮತ್ತು ಈರುಳ್ಳಿಯನ್ನು ಮುಖ್ಯ ಪದಾರ್ಥಗಳಾಗಿ ಉಪಯೋಗಿಸಿ ಮಾಡುತ್ತಾರೆ.
ಮದ್ದೂರ್ ವಡೆ  ವೀಡಿಯೊ

ತಯಾರಿ ಸಮಯ: 20 ನಿಮಿಷ
ಅಡುಗೆ ಸಮಯ : 10 ನಿಮಿಷ
ಪ್ರಮಾಣ : 4 ಜನರಿಗೆ

ಬೇಕಾಗುವ ಪದಾರ್ಥಗಳು: ( ಅಳತೆ ಕಪ್ = 120 ಎಂಎಲ್ )

  1. 1 ಕಪ್ ಮೈದಾ
  2. 1/2 ಕಪ್ ಅಕ್ಕಿ ಹಿಟ್ಟು
  3. 1/2 ಕಪ್ ಚಿರೋಟಿ ರವೆ / ಸಣ್ಣ ರವೆ
  4. 1 ಮಧ್ಯಮ ಗಾತ್ರದ ಈರುಳ್ಳಿ
  5. 1 - 2 ಹಸಿ ಮೆಣಸಿನ ಕಾಯಿ
  6. 1/4 ಟೀಸ್ಪೂನ್ ಹೆಚ್ಚಿದ ಶುಂಠಿ
  7. 1 ಟೇಬಲ್ ಸ್ಪೂನ್ ಹೆಚ್ಚಿದ ಕರಿಬೇವು
  8. 1 ಟೇಬಲ್ ಸ್ಪೂನ್ ಹೆಚ್ಚಿದ ಕೊತ್ತಂಬರಿ ಸೊಪ್ಪು
  9. ಚಿಟಿಕೆ ಇಂಗು
  10. 2 ಟೀಸ್ಪೂನ್ ತುಪ್ಪ / 2 ಟೇಬಲ್ ಸ್ಪೂನ್ ಬಿಸಿ ಎಣ್ಣೆ
  11. ಉಪ್ಪು ರುಚಿಗೆ ತಕ್ಕಷ್ಟು
  12. ಎಣ್ಣೆ ಕಾಯಿಸಲು

ಮದ್ದೂರ್ ವಡೆ ಮಾಡುವ ವಿಧಾನ:

  1. ಒಂದು ಅಗಲವಾದ ಪಾತ್ರೆಯಲ್ಲಿ ಮೈದಾ, ಅಕ್ಕಿ ಹಿಟ್ಟು ಮತ್ತು ರವೆಯನ್ನು ತೆಗೆದುಕೊಳ್ಳಿ. ಅದಕ್ಕೆ ಉಪ್ಪು ಮತ್ತು ತುಪ್ಪ / ಬಿಸಿ ಎಣ್ಣೆ ಹಾಕಿ ಕಲಸಿ. ನಂತರ ಹೆಚ್ಚಿದ ಈರುಳ್ಳಿ, ಕೊತ್ತಂಬರಿ ಸೊಪ್ಪು, ಕರಿಬೇವು, ಶುಂಠಿ, ಹಸಿಮೆಣಸು ಮತ್ತು ಇಂಗು ಹಾಕಿ.
  2. ನೀರು ಹಾಕದೆ ಚೆನ್ನಾಗಿ ಕಲಸಿ. 10 ನಿಮಿಷ ಹಾಗೆ ಬಿಡಿ. ನಂತರ ಸ್ವಲ್ಪ ಸ್ವಲ್ಪ ನೀರು ಚಿಮುಕಿಸಿ ಗಟ್ಟಿಯಾದ ಹಿಟ್ಟು ಕಲಸಿ.
  3. ಒಂದು ದಪ್ಪ ಪ್ಲಾಸ್ಟಿಕ್ ಹಾಳೆ ತೆಗೆದು ಕೊಂಡು, ಎಣ್ಣೆ ಹಚ್ಚಿ. ನಿಂಬೆ ಹಣ್ಣಿನ ಗಾತ್ರದ ಹಿಟ್ಟನ್ನು ಇಟ್ಟು, ಕೈಯಲ್ಲಿ ತಟ್ಟಿ, ವೃತ್ತಾಕಾರ ಮಾಡಿ.
  4. ಒಂದು ಬಾಣಲೆಯಲ್ಲಿ ಎಣ್ಣೆ ಇಟ್ಟು, ಎಣ್ಣೆ ಕಾದ ಮೇಲೆ, ಜಾಗ್ರತೆಯಿಂದ ತಟ್ಟಿದ ಹಿಟ್ಟನ್ನು ಎಣ್ಣೆಯಲ್ಲಿ ಬಿಡಿ. ಕಡಿಮೆ ಉರಿಯಲ್ಲಿ ಹೊಂಬಣ್ಣ ಬರುವ ವರೆಗೆ ಕಾಯಿಸಿರಿ. ತೆಂಗಿನಕಾಯಿ ಚಟ್ನಿ ಮತ್ತು ಟೀ ಯೊಂದಿಗೆ ಬಡಿಸಿ.

ಗುರುವಾರ, ನವೆಂಬರ್ 26, 2015

How to make ghee in Kannada | ತುಪ್ಪ ಮಾಡುವ ವಿಧಾನ


ತುಪ್ಪ ಮಾಡುವ ವಿಧಾನ

ಮನೆಯಲ್ಲಿ ಶುದ್ಧ ತುಪ್ಪ ಮಾಡುವ ವಿಧಾನವನ್ನು ಇಲ್ಲಿ ಚಿತ್ರ ಸಹಿತ ವಿವರಿಸಲಾಗಿದೆ. ಮನೆಯಲ್ಲಿ ಮಾಡಿದ ತುಪ್ಪದಲ್ಲಿ ಯಾವುದೇ ರೀತಿಯ ಕಲಬೆರಕೆ ಇಲ್ಲದಿರುವುದರಿಂದ, ಆದಷ್ಟು ಮನೆಯಲ್ಲೇ ತುಪ್ಪ ಮಾಡುವುದು ಉತ್ತಮ. ಅಲ್ಲದೇ ಮನೆಯಲ್ಲಿ ಮಾಡಿದ ತುಪ್ಪ ಒಳ್ಳೆ ಸುವಾಸನೆ 
ಮತ್ತು ರುಚಿಯನ್ನು ಹೊಂದಿರುತ್ತದೆ.

ತುಪ್ಪ ಮಾಡುವ ವಿಧಾನ:

  1. ಬೆಣ್ಣೆಯನ್ನು ಒಂದು ದಪ್ಪ ತಳದ ದೊಡ್ಡ ಪಾತ್ರೆಯಲ್ಲಿ ತೆಗೆದುಕೊಳ್ಳಿ. ಸ್ವಚ್ಛ ಬೆಣ್ನೆಗಾಗಿ ಹಲವಾರು ಬಾರಿ ಚೆನ್ನಾಗಿ ತೊಳೆಯಿರಿ (ನನ್ನಮ್ಮ ಹೇಳುವ ಪ್ರಕಾರ 7 ಬಾರಿ ತೊಳೆಯಬೇಕು). ನೀರನ್ನು ಸಂಪೂರ್ಣ ಬಗ್ಗಿಸಿ ತೆಗೆಯಿರಿ.
  2. ನಂತರ ಸ್ಟೋವ್ ಹಚ್ಚಿ ಬೆಣ್ಣೆಯನ್ನು ಕಾಯಲು ಇಡಿ. ಸ್ಟೋವ್ ಮಧ್ಯಮ ಉರಿಯಲ್ಲಿರಲಿ. ಕೆಲವೇ ಕ್ಷಣಗಳಲ್ಲಿ ಬೆಣ್ಣೆ ಸಂಪೂರ್ಣ ಕರಗಿ ನೊರೆ ನೊರೆಯಾಗಿ ಕುದಿಯಲಾರಂಬಿಸುತ್ತದೆ.
  3. ನಿಧಾನವಾಗಿ, ನೊರೆಯು ನೀರಿನ ಗುಳ್ಳೆಗಳಂತೆ ಬದಲಾಗಿ ಒಂದು ಸಣ್ಣ ಸದ್ದಿನೊಂದಿಗೆ ಕುದಿಯುವುದನ್ನು ನೀವು ಕಾಣುತ್ತೀರಿ. ಈ ಸಮಯದಲ್ಲಿ ಹಾಲಿನ ಗಟ್ಟಿ ಅಂಶ ತಳದಲ್ಲಿ ಶೇಖರಣೆಯಾಗ ತೊಡಗುತ್ತದೆ. ಆಗೊಮ್ಮೆ ಈಗೊಮ್ಮೆ ಮಗುಚಿ. ಸ್ವಲ್ಪ ಸಮಯದಲ್ಲಿ ಈ ಹಾಲಿನ ಗಟ್ಟಿ ಅಂಶ ಕಂದು ಬಣ್ಣಕ್ಕೆ ತಿರುಗುತ್ತದೆ. ಕೂಡಲೇ ಸ್ಟೋವ್ ಆಫ್ ಮಾಡಿ.
  4. ಒಂದು ಹತ್ತು ನಿಮಿಷ ಬಿಟ್ಟು, ನೀರಿನ ಪಸೆ ಇಲ್ಲದ ಪಾತ್ರೆಗೆ ಜರಡಿಯ ಸಹಾಯದಿಂದ ತುಪ್ಪವನ್ನು ಸೋಸಿ. ಮನೆಯಲ್ಲಿ ಮಾಡಿದ ಘಮ ಘಮ ತುಪ್ಪ ಸವಿಯಲು ಸಿದ್ಧ.



ಬುಧವಾರ, ನವೆಂಬರ್ 25, 2015

Bendekayi palya in Kannada | ಬೆಂಡೆಕಾಯಿ ಪಲ್ಯ ಮಾಡುವ ವಿಧಾನ


ಬೆಂಡೆಕಾಯಿ ಪಲ್ಯ ಮಾಡುವ ವಿಧಾನ 

ಈ ರೀತಿಯ ಬೆಂಡೆಕಾಯಿ ಪಲ್ಯವನ್ನು ನೀವು ದಕ್ಷಿಣ ಕರ್ನಾಟಕ ದಲ್ಲಿ ಕಾಣಬಹುದು. ಕೆಲವರು ಈ ಪಲ್ಯವನ್ನು ಬೆಲ್ಲ ಹಾಕದೆ ಅಥವಾ ತೆಂಗಿನ ಕಾಯಿ ರುಬ್ಬದೆ ಮಾಡುತ್ತಾರೆ. ನೀವು ನಿಮ್ಮ ರುಚಿಗೆ ತಕ್ಕಂತೆ ಮಾಡಬಹುದು. ಆದರೆ ಈ ರೀತಿಯ ಪಲ್ಯ ಬಹಳ ರುಚಿಯಾಗಿದ್ದು, ಚಪಾತಿ ಅಥವಾ ಅನ್ನದೊಂದಿಗೆ ತಿನ್ನಲು ರುಚಿಯಾಗಿರುತ್ತದೆ. ಬೆಂಡೆಕಾಯಿಯಲ್ಲಿ ಅನೇಕ ಆರೋಗ್ಯ ದಾಯಕ ಅಂಶಗಳಿದ್ದು, ಈ ಅಡುಗೆಯನ್ನು ನೀವು ಒಮ್ಮೆ ಪ್ರಯತ್ನಿಸ ಬಾರದೇಕೆ?
ಬೆಂಡೆಕಾಯಿ ಪಲ್ಯ ವಿಡಿಯೋ
ತಯಾರಿ ಸಮಯ: 10 ನಿಮಿಷ
ಅಡುಗೆ ಸಮಯ : 10 ನಿಮಿಷ
ಪ್ರಮಾಣ : 2 ಜನರಿಗೆ

ಪದಾರ್ಥಗಳು: ( ಅಳತೆ ಕಪ್ = 120 ಎಂಎಲ್ )

  1. 250 ಗ್ರಾಂ ಬೆಂಡೆಕಾಯಿ
  2. 1 ಟೀಸ್ಪೂನ್ ಉದ್ದಿನ ಬೇಳೆ
  3. 1 ಟೀಸ್ಪೂನ್ ಕಡ್ಲೆ ಬೇಳೆ
  4. 4 ಟೀಸ್ಪೂನ್ ಅಡುಗೆ ಎಣ್ಣೆ
  5. 1/2 ಟೀಸ್ಪೂನ್ ಸಾಸಿವೆ
  6. 1 ಚಿಟಿಕೆ ಅರಿಶಿನ ಪುಡಿ
  7. 1 ಚಿಟಿಕೆ ಇಂಗು
  8. 4 - 5 ಕರಿಬೇವಿನ ಎಲೆ
  9. ಹುಣಸೆ ಹಣ್ಣು ಅರ್ಧ ನಿಂಬೆ ಗಾತ್ರ
  10. ಬೆಲ್ಲ ಅರ್ಧ ನಿಂಬೆ ಗಾತ್ರ
  11. 1-2 ಒಣ ಮೆಣಸಿನ ಕಾಯಿ
  12. 1/2 ಕಪ್ ತೆಂಗಿನ ತುರಿ
  13. ಉಪ್ಪು ರುಚಿಗೆ ತಕ್ಕಷ್ಟು
  14. ಕಪ್ ನೀರು ಹುಣಿಸೆ ಹಣ್ಣಿನ ರಸಕ್ಕೆ

ಬೆಂಡೆಕಾಯಿ ಪಲ್ಯ ಮಾಡುವ ವಿಧಾನ:

  1. ಬೆಂಡೆಕಾಯಿ ತೊಳೆದು, ತುದಿ ಮತ್ತು ಬುಡ ತೆಗೆದು, 1/2 ಸೆಮೀ ಉದ್ದಕ್ಕೆ ಕತ್ತರಿಸಿಕೊಳ್ಳಿ.
  2. ಒಂದು ಬಾಣಲೆ ತೆಗೆದುಕೊಂಡು, ಎಣ್ಣೆ ಹಾಕಿ, ಸಾಸಿವೆ, ಉದ್ದಿನಬೇಳೆ ಮತ್ತು ಕಡ್ಲೆಬೇಳೆ ಹಾಕಿ. ಸಾಸಿವೆ ಸಿಡಿದ ಕೂಡಲೇ ಅರಶಿನ, ಇಂಗು ಮತ್ತು ಕರಿಬೇವಿನ ಎಲೆ ಹಾಕಿ.
  3. ನಂತರ ಕತ್ತರಿಸಿದ ಬೆಂಡೆಕಾಯಿ ಹಾಕಿ, ಮಗುಚಿ. ಉಪ್ಪು, ಬೆಲ್ಲ ಮತ್ತು ಹುಣಿಸೆ ರಸ ಹಾಕಿ, ಮಂದ ಉರಿಯಲ್ಲಿ ಬೇಯಲು ಬಿಡಿ. ಆಗಾಗ ಮಗುಚುತ್ತಾ ಇರಿ.
  4. ಈ ಸಮಯದಲ್ಲಿ ಒಂದು ಮಿಕ್ಸಿ ಜಾರ್ ತೆಗೆದುಕೊಂಡು, ತೆಂಗಿನ ತುರಿ, 1/4 ಚಮಚ ಸಾಸಿವೆ ಮತ್ತು ಒಣ ಮೆಣಸು ಹಾಕಿ, ನೀರು ಹಾಕದೆ ಪುಡಿ ಮಾಡಿ.
  5. ಬೆಂಡೆಕಾಯಿ ಬೇಯುವವರೆಗೆ ಕಾಯಿರಿ.
  6. ಈಗ ಪುಡಿ ಮಾಡಿದ ಮಸಾಲೆ ಹಾಕಿ, 2 ನಿಮಿಷ ಮಗುಚಿ. ಸ್ಟೋವ್ ಆಫ್ ಮಾಡಿ. ಚಪಾತಿ ಅಥವಾ ಅನ್ನದೊಂದಿಗೆ ಬಡಿಸಿ.

ಮಂಗಳವಾರ, ನವೆಂಬರ್ 24, 2015

mulangi-capsicum-dalimbe sasive | ಮೂಲಂಗಿ-ಕ್ಯಾಪ್ಸಿಕಂ-ದಾಳಿಂಬೆ ರಾಯಿತ

mulangi-capsicum-dalimbe sasive | ಮೂಲಂಗಿ-ಕ್ಯಾಪ್ಸಿಕಂ-ದಾಳಿಂಬೆ ರಾಯಿತ ಅಥವಾ ಸಾಸಿವೆ


ಇದೊಂದು ಸುಲಭ ಮತ್ತು ಆರೋಗ್ಯಕರ ಅಡುಗೆಯಾಗಿದ್ದು, ಮೂಲಂಗಿ, ಕ್ಯಾಪ್ಸಿಕಂ (ದೊಣ್ಣೆ ಮೆಣಸು) ಮತ್ತು ದಾಳಿಂಬೆ ಉಪಯೋಗಿಸಿ ಮಾಡಿದ ಸಾಸುವೆ(ರಾಯಿತ) ಯಾಗಿದೆ. ಇದನ್ನು ಅನ್ನದೊಂದಿಗೆ ಅಥವಾ ಹಾಗೆಯೂ ತಿನ್ನ ಬಹುದು.

ಮೂಲಂಗಿಯಲ್ಲಿ ಸಿ ವಿಟಮಿನ್ ಹೇರಳವಾಗಿದ್ದು, ಅನೇಕ ಖಾಯಿಲೆಗಳಿಗೆ ರಾಮಬಾಣವಾಗಿದೆ. ಮೂಲಂಗಿಯ ನಿಯಮಿತ ಸೇವನೆಯು ಮಲಬದ್ದತೆ, ಅರಶಿನ ಕಾಮಾಲೆ, ಅಧಿಕ ರಕ್ತದೊತ್ತಡ, ಮಧುಮೇಹ, ಕ್ಯಾನ್ಸರ್ ಹೀಗೆ ಅನೇಕ ಖಾಯಿಲೆಗಳನ್ನು ದೂರವಿಡಲು ಸಹಕಾರಿಯಾಗಿದೆ. ಕ್ಯಾಪ್ಸಿಕಂ ಬಹಳ ರುಚಿಕರ ತರಕಾರಿಯಾಗಿದ್ದು, ಅತ್ಯಂತ ಕಡಿಮೆ ಕ್ಯಾಲೋರಿಯನ್ನು ಹೊಂದಿದೆ. ಇದರಲ್ಲಿ ಬಹಳಷ್ಟು ವಿಟಮಿನ್ ಗಳು ಇದ್ದು, ಕಣ್ಣಿನ ಆರೋಗ್ಯಕ್ಕೆ ಒಳ್ಳೆಯದು ಎನ್ನಲಾಗಿದೆ. ಹಾಗೂ ದಾಳಿಂಬೆಯಲ್ಲಿ ರೋಗನಿರೋಧಕ ಶಕ್ತಿ ಮತ್ತು ಅನೇಕ ಪೋಷಕಾಂಶಗಳಿದ್ದು ಆರೋಗ್ಯದಾಯಕವೆನಿಸಿಕೊಂಡಿದೆ. ಹಾಗಾಗಿ ಈ ಮೂರು ಪದಾರ್ಥಗಳನ್ನು ಸೇರಿಸಿ ಮಾಡಿದ ರುಚಿಕರ ರಾಯಿತವನ್ನು ನೀವು ಒಮ್ಮೆಯಾದರೂ ಮಾಡಿ ನೋಡಿ.

ತಯಾರಿ ಸಮಯ: 15 ನಿಮಿಷ
ಅಡುಗೆ ಸಮಯ : 5 ನಿಮಿಷ
ಪ್ರಮಾಣ : 2 ಜನರಿಗೆ

ಬೇಕಾಗುವ ಪದಾರ್ಥಗಳು: (ಅಳತೆ ಕಪ್ = 240 ಎಂಎಲ್)

  1. 1 ಮಧ್ಯಮ ಗಾತ್ರದ ಮೂಲಂಗಿ 
  2. 1/2 ದಾಳಿಂಬೆ 
  3. 1/2 ಕ್ಯಾಪ್ಸಿಕಂ 
  4. 1/2 - 1 ಕಪ್ ತೆಂಗಿನ ತುರಿ 
  5. 1/2 - 1 ಕಪ್ ಗಟ್ಟಿ ಮೊಸರು 
  6. 1/2 ಕಪ್ ನೀರು 
  7. ಉಪ್ಪು ರುಚಿಗೆ ತಕ್ಕಷ್ಟು 
  8. 1 ಒಣ ಮೆಣಸಿನಕಾಯಿ 
  9. 1/4 ಟೀಸ್ಪೂನ್ ಸಾಸಿವೆ 
  10. 2 ಟೀಸ್ಪೂನ್ ಅಡುಗೆ ಎಣ್ಣೆ

ಮೂಲಂಗಿ-ಕ್ಯಾಪ್ಸಿಕಂ-ದಾಳಿಂಬೆ ರಾಯಿತ ಮಾಡುವ ವಿಧಾನ:

  1. ಕ್ಯಾಪ್ಸಿಕಂ ನ್ನು ಹೆಚ್ಚಿ ಒಂದು ಬಾಣಲೆಗೆ ಹಾಕಿ. 1 ಟೀಸ್ಪೂನ್ ಎಣ್ಣೆ ಹಾಕಿ, ಮಧ್ಯಮ ಉರಿಯಲ್ಲಿ ಹುರಿದು, ತಣ್ಣಗಾಗಲು ಬಿಡಿ. 
  2. ಮೂಲಂಗಿ ತುರಿದು, ದಾಳಿಂಬೆ ಬೀಜ ಬಿಡಿಸಿಕೊಂಡು ಒಂದು ಪಾತ್ರೆಗೆ ಹಾಕಿ. ತೆಂಗಿನಕಾಯಿ ಯನ್ನು ನುಣ್ಣಗೆ ರುಬ್ಬಿ ಸೇರಿಸಿ. ಮೊಸರು, ನೀರು ಮತ್ತು ಉಪ್ಪು ಹಾಕಿ ಕಲಸಿ. 
  3. ಈಗ ಹುರಿದು ತಣ್ಣಗಾದ ಕ್ಯಾಪ್ಸಿಕಂ ಸೇರಿಸಿ. ಎಣ್ಣೆ, ಒಣ ಮೆಣಸು ಮತ್ತು ಸಾಸಿವೆ ಒಗ್ಗರಣೆ ಮಾಡಿ.

ಶುಕ್ರವಾರ, ನವೆಂಬರ್ 20, 2015

Pumpkin idli recipe in kannada | ಚೀನಿಕಾಯಿ ಇಡ್ಲಿ | ಚೀನಿಕಾಯಿ ಕಡುಬು

Pumpkin idli recipe in kannada | ಚೀನಿಕಾಯಿ ಇಡ್ಲಿ ಅಥವಾ ಕಡುಬು ಮಾಡುವ ವಿಧಾನ

ಚೀನಿಕಾಯಿ ಇಡ್ಲಿ ವಿಡಿಯೋ

ಸಿಹಿ ಇಡ್ಲಿಗೆ ಬೇಕಾಗುವ ಪದಾರ್ಥಗಳು: ( ಅಳತೆ ಕಪ್ = 240 ಎಂಎಲ್ )

  1. 1 ಕಪ್ ತುರಿದ ಚೀನಿಕಾಯಿ
  2. 1/2 ಕಪ್ ತೆಂಗಿನ ತುರಿ
  3. 1/4 ಕಪ್ ಪುಡಿ ಮಾಡಿದ ಬೆಲ್ಲ
  4. 1/2 ಕಪ್ ಇಡ್ಲಿ ರವಾ
  5. 2 - 3 ಟೇಬಲ್ ಸ್ಪೂನ್ ನೀರು
  6. ಒಂದು ಏಲಕ್ಕಿ 
  7. ಉಪ್ಪು ರುಚಿಗೆ ತಕ್ಕಷ್ಟು.

ಖಾರ ಇಡ್ಲಿಗೆ ಬೇಕಾಗುವ ಪದಾರ್ಥಗಳು: ( ಅಳತೆ ಕಪ್ = 240 ಎಂಎಲ್ )

  1. 1 ಕಪ್ ತುರಿದ ಚೀನಿಕಾಯಿ
  2. 1/2 ಕಪ್ ತೆಂಗಿನ ತುರಿ
  3. 1 - 2 ಒಣಮೆಣಸಿನಕಾಯಿ
  4. 1/2 ಕಪ್ ಇಡ್ಲಿ ರವಾ
  5. 2 - 3 ಟೇಬಲ್ ಸ್ಪೂನ್ ನೀರು
  6. ಸಣ್ಣ ಚೂರು ಶುಂಠಿ 
  7. ಸ್ವಲ್ಪ ಕೊತ್ತಂಬರಿ ಸೊಪ್ಪು
  8. ಉಪ್ಪು ರುಚಿಗೆ ತಕ್ಕಷ್ಟು.

ಚೀನಿಕಾಯಿ ಸಿಹಿ ಇಡ್ಲಿ ಮಾಡುವ ವಿಧಾನ:

  1. ಒಂದು ಮಿಕ್ಸಿಯಲ್ಲಿ ಕಾಯಿತುರಿ, ಬೆಲ್ಲ ಮತ್ತು ಏಲಕ್ಕಿಯನ್ನು ನೀರು ಹಾಕದೆ ಪುಡಿ ಮಾಡಿ. 
  2. ಅದನ್ನು ಒಂದು ಪಾತ್ರೆಗೆ ಹಾಕಿ. 
  3. ನಂತರ ಇಡ್ಲಿ ರವೆ, ಉಪ್ಪು ಮತ್ತು ಸ್ವಲ್ಪ ನೀರು ಹಾಕಿ. 
  4. ಕೈಯಲ್ಲಿ ಚೆನ್ನಾಗಿ ಒತ್ತಿ ಕಲಸಿ. 5 ನಿಮಿಷ ಹಾಗೆ ಬಿಡಿ.
  5. ಈಗ ಇಡ್ಲಿ ತಟ್ಟೆ ತೆಗೆದುಕೊಂಡು, ಸ್ವಲ್ಪ ಸ್ವಲ್ಪ ಮಿಶ್ರಣವನ್ನು ಹಾಕಿ, ಕೈಯಲ್ಲಿ ಒತ್ತಿ, ಇಡ್ಲಿ ರೂಪಕ್ಕೆ ತನ್ನಿ. 12 - 15 ನಿಮಿಷ ಸೆಕೆ / ಆವಿಯಲ್ಲಿ ಬೇಯಿಸಿ. 
  6. ಇಡ್ಲಿ ಬಿಸಿಯಾಗಿರುವಾಗಲೇ ತುಪ್ಪದೊಂದಿಗೆ ಬಡಿಸಿ.

ಚೀನಿಕಾಯಿ ಖಾರ ಇಡ್ಲಿ ಮಾಡುವ ವಿಧಾನ:

  1. ಒಂದು ಮಿಕ್ಸಿಯಲ್ಲಿ ಕಾಯಿತುರಿ, ಒಣಮೆಣಸು, ಶುಂಠಿ, ಕೊತ್ತಂಬರಿ ಸೊಪ್ಪು ಮತ್ತು ಉಪ್ಪನ್ನು ಹಾಕಿ. ನೀರು ಹಾಕದೆ ಪುಡಿ ಮಾಡಿ. 
  2. ಅದನ್ನು ಒಂದು ಪಾತ್ರೆಗೆ ಹಾಕಿ. 
  3. ನಂತರ ಇಡ್ಲಿ ರವೆ ಮತ್ತು ಸ್ವಲ್ಪ ನೀರು ಹಾಕಿ, ಕೈಯಲ್ಲಿ ಚೆನ್ನಾಗಿ ಒತ್ತಿ ಕಲಸಿ. 5 ನಿಮಿಷ ಹಾಗೆ ಬಿಡಿ.
  4. ಈಗ ಇಡ್ಲಿ ತಟ್ಟೆ ತೆಗೆದುಕೊಂಡು, ಸ್ವಲ್ಪ ಸ್ವಲ್ಪ ಮಿಶ್ರಣವನ್ನು ಹಾಕಿ, ಕೈಯಲ್ಲಿ ಒತ್ತಿ, ಇಡ್ಲಿ ರೂಪಕ್ಕೆ ತನ್ನಿ. 12 - 15 ನಿಮಿಷ ಸೆಕೆ / ಆವಿಯಲ್ಲಿ ಬೇಯಿಸಿ. 
  5. ಇಡ್ಲಿ ಬಿಸಿಯಾಗಿರುವಾಗಲೇ ತುಪ್ಪ ಅಥವಾ ಚಟ್ನಿ ಯೊಂದಿಗೆ ಬಡಿಸಿ.

ಗುರುವಾರ, ನವೆಂಬರ್ 19, 2015

Carrot milkshake recipe in Kannada | ಕ್ಯಾರೆಟ್ ಮಿಲ್ಕ್‌ಶೇಕ್ | ಕ್ಯಾರೆಟ್ ಜೂಸ್


Carrot milkshake recipe in Kannada | ಕ್ಯಾರೆಟ್ ಮಿಲ್ಕ್‌ಶೇಕ್ ಅಥವಾ  ಕ್ಯಾರೆಟ್ ಜೂಸ್ ಮಾಡುವ ವಿಧಾನ 

ಕ್ಯಾರೆಟ್ ಮಿಲ್ಕ್‌ಶೇಕ್ ಅಥವಾ ಕ್ಯಾರೆಟ್ ಜೂಸ್ ಸರಳ ಮತ್ತು ಆರೋಗ್ಯಕರ ಪಾನೀಯವಾಗಿದೆ. ಕ್ಯಾರೆಟ್ ಮಿಲ್ಕ್‌ಶೇಕ್ ಬಹಳ ರುಚಿಕರವಾಗಿದ್ದು ಬೇಸಿಗೆ ಬಿಸಿಲಿಗೆ ದೇಹವನ್ನು ತಂಪು ಗೊಳಿಸುತ್ತದೆ. ಕ್ಯಾರೆಟ್ ನಲ್ಲಿ ಆಂಟಿ ಆಕ್ಸಿಡೆಂಟ್, ಬೀಟಾ ಕ್ಯಾರೋಟಿನ್ ಮತ್ತು ವಿಟಮಿನ್ ಎ ಹೀಗೆ ಅನೇಕ ಪೋಷಕಾಂಶಗಳು ಇದ್ದು, ನಿಯಮಿತ ಸೇವನೆಯಿಂದ ಕಣ್ಣಿನ ಆರೋಗ್ಯ ಮತ್ತು ಚರ್ಮದ ಕಾಂತಿ ಯನ್ನು ಕಾಪಾಡಿಕೊಳ್ಳಲು, ಕ್ಯಾನ್ಸರ್ ನಂಥ ಕಾಯಿಲೆಯನ್ನು ದೂರವಿಡಲೂ ಇದು ಸಹಕಾರಿಯಾಗಿದೆ.
ಕ್ಯಾರೆಟ್ ಮಿಲ್ಕ್‌ಶೇಕ್ ಪ್ರತಿನಿತ್ಯ ಸೇವಿಸುತ್ತಾ ಬಂದಲ್ಲಿ, ಕೆಲವು ವಾರಗಳ ನಂತರ ಚರ್ಮದ ಕಾಂತಿ ಹೆಚ್ಚುವುದನ್ನು ಕಾಣಬಹುದು. ಇಷ್ಟೆಲ್ಲ ಮಹಿಮೆ ಹೊಂದಿರುವ ಕ್ಯಾರೆಟ್ ನ್ನು ನಮ್ಮ ಆಹಾರ ಪದ್ದತಿಯಲ್ಲಿ ಸೇರಿಸಲು ಈ ಮಿಲ್ಕ್‌ಶೇಕ್ ಸಹಕಾರಿಯಾಗಿದೆ. ಅತ್ಯಂತ ಕಡಿಮೆ ಸಮಯದಲ್ಲಿ ಇದನ್ನು ತಯಾರಿಸಬಹುದು ಹಾಗೂ ಹೊಟ್ಟೆಯೂ ತುಂಬುತ್ತದೆ.
ಇನ್ನು ತರಕಾರಿ ತಿನ್ನಲು ಇಷ್ಟಪಡದ ಮಕ್ಕಳಿಗೆ ಈ ಮಿಲ್ಕ್‌ಶೇಕ್ ಮಾಡಿ ಕೊಟ್ಟಲ್ಲಿ, ಅವರಿಗೆ ಖಂಡಿತ ಇಷ್ಟವಾಗುವುದು. ಜೊತೆಗೆ ಒಳ್ಳೆ ಆಹಾರ ಒದಗಿಸಿದ ಸಮಾಧಾನವೂ ಸಿಗುತ್ತದೆ.
ತಯಾರಿ ಸಮಯ: 5 ನಿಮಿಷ
ಅಡುಗೆ ಸಮಯ : 0 ನಿಮಿಷ
ಪ್ರಮಾಣ: 2 ಕಪ್

ಬೇಕಾಗುವ ಪದಾರ್ಥಗಳು:( ಅಳತೆ ಕಪ್ = 240 ಎಂಎಲ್ )

  1. 2 ಮಧ್ಯಮ ಗಾತ್ರದ ಕ್ಯಾರೆಟ್
  2. 2 ಟೇಬಲ್ ಸ್ಪೂನ್ ತೆಂಗಿನ ತುರಿ
  3. 1/2 ಕಪ್ ನೀರು
  4. 1/2 ಕಪ್ ಕುದಿಸಿ ಆರಿಸಿದ ಹಾಲು
  5. 8 ಟೀಸ್ಪೂನ್ ಸಕ್ಕರೆ (ಅಥವಾ ರುಚಿಗೆ ತಕ್ಕಷ್ಟು)
  6. ಒಂದು ಸಣ್ಣ ಚಿಟಿಕೆ ಏಲಕ್ಕಿ ಪುಡಿ

ಕ್ಯಾರೆಟ್ ಮಿಲ್ಕ್‌ಶೇಕ್ ಮಾಡುವ ವಿಧಾನ:

  1. ಕ್ಯಾರೆಟ್ ನ್ನು ತೊಳೆದು, ಸಣ್ಣ ತುಂಡುಗಳಾಗಿ ಕತ್ತರಿಸಿ. ಒಂದು ಮಿಕ್ಸೀ ಜಾರ್ ತೆಗೆದುಕೊಂಡು, ಕ್ಯಾರೆಟ್ ಮತ್ತು ತೆಂಗಿನ ತುರಿ ಹಾಕಿ, 1/2 ಕಪ್ ನೀರು ಬಳಸಿಕೊಂಡು ನಯವಾಗಿ ಅರೆಯಿರಿ.
  2. ಅರೆದ ಮಿಶ್ರಣವನ್ನು ಒಂದು ಪಾತ್ರೆಗೆ ಹಾಕಿ, ಹಾಲು ಮತ್ತು ಸಕ್ಕರೆ ಸೇರಿಸಿ ಚೆನ್ನಾಗಿ ಕಲಕಿ. ಕೊನೆಯಲ್ಲಿ ಏಲಕ್ಕಿ ಪುಡಿ ಉದುರಿಸಿ.

ಬುಧವಾರ, ನವೆಂಬರ್ 18, 2015

lemon-ginger-green-chilli pickle in Kannada | ನಿಂಬೆ-ಶುಂಠಿ-ಹಸಿಮೆಣಸು ಉಪ್ಪಿನಕಾಯಿ

lemon-ginger-green-chili pickle in Kannada

lemon-ginger-green-chili pickle in Kannada । ನಿಂಬೆ-ಶುಂಠಿ-ಹಸಿಮೆಣಸು ಉಪ್ಪಿನಕಾಯಿ ಮಾಡುವ ವಿಧಾನ 

ಈ ಉಪ್ಪಿನಕಾಯಿ ತುಂಬಾ ಸರಳ ಉಪ್ಪಿನಕಾಯಿಯಾಗಿದ್ದು, ನಿಂಬೆ ಹಣ್ಣು, ಶುಂಠಿ, ಉಪ್ಪು ಮತ್ತು ಹಸಿಮೆಣಸು ಉಪಯೋಗಿಸಿ ಮಾಡಲಾಗುತ್ತದೆ. ಇದನ್ನು ಅನ್ನ ಅಥವಾ ಮೊಸರನ್ನದೊಂದಿಗೆ ಸವಿಯಬಹುದು. ನೀವು ನೆಗಡಿ ಅಥವಾ ಜ್ವರದಿಂದ ಬಳಲುತ್ತಿದ್ದರಂತು, ಈ ಉಪ್ಪಿನಕಾಯಿಯನ್ನು ಊಟ ಅಥವಾ ಗಂಜಿಯೊಂದಿಗೆ ತಿನ್ನಲು ಬಹಳ ರುಚಿ ಎನಿಸುತ್ತದೆ. ನಿಂಬೆ ಹಣ್ಣಿನ ಸ್ವಾದ, ಕಳೆದುಕೊಂಡ ಬಾಯಿರುಚಿಯನ್ನು ಹೆಚ್ಚಿಸುತ್ತದೆ.
ಬೇರೆ ಕೆಲವು ನಿಂಬೆ ಹಣ್ಣಿನ ಉಪ್ಪಿನಕಾಯಿಗಳಂತೆ ಈ ಉಪ್ಪಿನಕಾಯಿಯನ್ನು ಕೂಡಲೇ ಉಪಯೋಗಿಸಲಾಗುವುದಿಲ್ಲ. ಕನಿಷ್ಟ 15 ದಿನಗಳ ಕಾಲ ಆದರೂ ಕಾಯಬೇಕಾಗುತ್ತದೆ. ಅಷ್ಟರಲ್ಲಿ ಎಲ್ಲ ಪದಾರ್ಥಗಳು ಉಪ್ಪಿನೊಂದಿಗೆ ಹೊಂದಿಕೊಂಡು, ಮೆತ್ತಗಾಗಿ ಸವಿಯಲು ಯೋಗ್ಯವಾಗುತ್ತದೆ.ಈ ಉಪ್ಪಿನಕಾಯಿಯಲ್ಲಿ ಎಣ್ಣೆಯಾಗಲಿ ಅಥವಾ ಬೇರೆ ಮಸಾಲೆ ಪದಾರ್ಥಗಳಾಗಲಿ ಇರುವುದಿಲ್ಲ.
ನಾನು ಈ ಉಪ್ಪಿನಕಾಯಿ ಹುಳಿ ಕಡಿಮೆ ಮಾಡಲು ಸ್ವಲ್ಪ ಮಾವಿನಕಾಯಿ ಶುಂಠಿಯನ್ನು ಉಪಯೋಗಿಸಿದ್ದೇನೆ. ಅದರ ಬದಲಾಗಿ ಸಣ್ಣ ಕ್ಯಾರೆಟ್ ಬೇಕಾದರೂ ಉಪಯೋಗಿಸಬಹುದು. ಅಥವಾ ನನ್ನಮ್ಮ ಮಾಡುವ ಹಾಗೆ ಎಲ್ಲ ನಿಂಬೆ ಹಣ್ಣುಗಳಿಂದ ಸ್ವಲ್ಪ ಸ್ವಲ್ಪ ರಸವನ್ನು ಹಿಂಡಿ ತೆಗೆಯಬಹುದು. ನಿಮ್ಮ ರುಚಿಗೆ ಅನುಸಾರವಾಗಿ ನಿರ್ಧರಿಸಿ.
ತಯಾರಿ ಸಮಯ: 10 ನಿಮಿಷ
ಅಡುಗೆ ಸಮಯ : 0 ನಿಮಿಷ
ಪ್ರಮಾಣ: 2 ಕಪ್

ಬೇಕಾಗುವ ಪದಾರ್ಥಗಳು:( ಅಳತೆ ಕಪ್ = 240 ಎಂಎಲ್ )

  1. 5 ನಿಂಬೆ ಹಣ್ಣು
  2. 6 ಹಸಿ ಮೆಣಸಿನಕಾಯಿ (ಅಥವಾ ರುಚಿಗೆ ತಕ್ಕಷ್ಟು)
  3. 2 ಬೆರಳುದ್ದ ಮಾವಿನಕಾಯಿ ಶುಂಠಿ (ಬೇಕಾದಲ್ಲಿ)
  4. 1 ಬೆರಳುದ್ದ ಶುಂಠಿ
  5. 5 ಟೀಸ್ಪೂನ್ ಕಲ್ಲುಪ್ಪು (ಅಥವಾ ರುಚಿಗೆ ತಕ್ಕಷ್ಟು)

ನಿಂಬೆ-ಶುಂಠಿ-ಹಸಿಮೆಣಸು ಉಪ್ಪಿನಕಾಯಿ ಮಾಡುವ ವಿಧಾನ:

  1. ಎಲ್ಲ ಪದಾರ್ಥಗಳನ್ನು ತೊಳೆದು ನೀರು ಆರಿಸಿ. 
  2. ಒಂದು ನೀರಿನ ಪಸೆ ಇಲ್ಲದ ಗಾಜಿನ ಪಾತ್ರೆ ತೆಗೆದು ಕೊಳ್ಳಿ.
  3. ಈಗ ತೊಳೆದು ನೀರಾರಿದ ಎಲ್ಲ ಪದಾರ್ಥಗಳನ್ನು ಹೆಚ್ಚಿಟ್ಟು ಕೊಳ್ಳಿ.
  4. ನಂತರ ಗಾಜಿನ ಪಾತ್ರೆಯಲ್ಲಿ ಪದರ ಪದರವಾಗಿ, ಉಪ್ಪನ್ನು ಸೇರಿಸಿ ಎಲ್ಲ ಪದಾರ್ಥಗಳನ್ನು ಹಾಕಿ.
  5. ಕೊನೆಯಲ್ಲಿ ಮೇಲಿನಿಂದ 1 ಟಿ ಸ್ಪೂನ್ ಉಪ್ಪು ಹಾಕಿ, ಮುಚ್ಚಳ ಮುಚ್ಚಿ. ಫ್ರಿಡ್ಜ್ ನಲ್ಲಿ ಇಡಬೇಡಿ. ನಂತರ ನೀರಿಲ್ಲದ ಚಮಚೆಯಲ್ಲಿ, 15 ದಿನಗಳ ಕಾಲ ದಿನಕ್ಕೊಂದು ಬಾರಿ ಮಗುಚುತ್ತಾ ಇರಿ. 15 ದಿನಗಳ ನಂತರ ರುಚಿಯಾದ ಉಪ್ಪಿನಕಾಯಿ ಸಿದ್ಧವಾಗುತ್ತದೆ.

ಭಾನುವಾರ, ನವೆಂಬರ್ 15, 2015

Neer dose Recipe in Kannada | ನೀರು ದೋಸೆ | ಬರೀ ಅಕ್ಕಿ ದೋಸೆ

Neer dose Recipe in Kannada

Neer dose Recipe in Kannada | ನೀರು ದೋಸೆ | ಬರೀ ಅಕ್ಕಿ ದೋಸೆ

ನೀರ್ ದೋಸೆ ಕರ್ನಾಟಕ ರಾಜ್ಯದ ದಕ್ಷಿಣ ಭಾಗದ ಅತ್ಯಂತ ಪ್ರಸಿದ್ಧ ಅಡುಗೆಯಾಗಿದೆ. ನೀರ್ ದೋಸೆ ಯನ್ನು ಹೆಚ್ಚಾಗಿ ಮಂಗಳೂರು ಮತ್ತು ಉಡುಪಿ ಭಾಗದ ಅಡುಗೆಯಾಗಿ ಗುರುತಿಸಲಾಗಿದೆ. ಆದರೆ ಈ ದೋಸೆ ಕುಂದಾಪುರ ಮತ್ತು ಮಲೆನಾಡು ಪ್ರದೇಶದಾದ್ಯಂತ ಬಹಳ ಹಳೆಯ ಕಾಲದಿಂದ ಆಚರಣೆಯಲ್ಲಿದೆ. ಮಲೆನಾಡಿನಲ್ಲಿ ಸಾಧಾರಣವಾಗಿ ಇದನ್ನು " ಬರೀ ಅಕ್ಕಿ ದೋಸೆ " ಎಂದು ಕುಂದಾಪುರ ಪ್ರದೇಶದಲ್ಲಿ "ತೆಳ್ಳಿನ್ ದೋಸೆ" ಎಂದು ಕರೆಯಲಾಗುತ್ತದೆ. ನೀರ್ ದೋಸೆಯಲ್ಲಿ ಹಿಟ್ಟು ಹುದುಗುವಿಕೆ ಬೇಕಾಗದೇ ಇರುವುದರಿಂದ, ಅಕ್ಕಿಯೊಂದನ್ನು ನೆನೆಸಿಟ್ಟರೆ, ಆಮೇಲೆ ಅತೀ ಕಡಿಮೆ ಸಮಯದಲ್ಲಿ ದೋಸೆ ತಯಾರಿಸಬಹುದು. ತೆಳುವಾದ ಗರಿಗರಿ ದೋಸೆ ತಯಾರಿಸಲು ಸ್ವಲ್ಪ ಅನುಭವದ ಅಗತ್ಯವಿದೆ. ಚೆನ್ನಾಗಿರುವ ದೋಸೆ ತಯಾರಿಸುವಲ್ಲಿ ಒಳ್ಳೆ ಗುಣಮಟ್ಟದ ದೋಸೆ ಕಾವಲಿ, ಸರಿಯಾದ ಪ್ರಮಾಣದ ನೀರು ಮತ್ತು ಒಳ್ಳೆ ಗುಣಮಟ್ಟದ ಅಕ್ಕಿ ಬಹಳ ಮುಖ್ಯ ಪಾತ್ರ ವಹಿಸುತ್ತದೆ. ಒಂದೆರಡು ಸಲ ಪ್ರಯತ್ನಿಸಿದರೆ ನಿಮಗೆ ಈ ಅಂಶಗಳು ಮನದಟ್ಟಾಗುತ್ತವೆ.
ಕೇವಲ ಅಕ್ಕಿ, ಉಪ್ಪು ಮತ್ತು ನೀರನ್ನು ಉಪಯೋಗಿಸಿ ಈ ದೋಸೆ ಮಾಡಲಾಗುವುದು. ಕರಾವಳಿ ಪ್ರದೇಶದಲ್ಲಿ ಸ್ವಲ್ಪ ತೆಂಗಿನಕಾಯಿ ಯನ್ನು ಸಹ ಸೇರಿಸುತ್ತಾರೆ. ಇದರಿಂದ ದೋಸೆ ಮೃದುವಾಗಿ, ಸ್ವಲ್ಪ ಬೇರೆ ರುಚಿ ಇರುತ್ತದೆ. ಈ ದೋಸೆ ಮಾಡಲು ಅದಕ್ಕೆಂದೇ ಸಿಗುವ ಕಬ್ಬಿಣದ ಹೆಂಚು ಬಳಸಲಾಗುತ್ತದೆ. ಆದರೆ ನಾನ್-ಸ್ಟಿಕ್ ತವ ಉಪಯೋಗಿಸಿ ಸಹ ಮಾಡಬಹುದು. ಇನ್ನೂ ಈ ದೋಸೆ ಮಾಡಲು ನೀವು ಯಾವುದೇ ಅಕ್ಕಿಯನ್ನು ಉಪಯೋಗಿಸ ಬಹುದು. ಸಾಧಾರಣವಾಗಿ ದೋಸೆ ಅಕ್ಕಿ ಉಪಯೋಗಿಸುತ್ತಾರೆ, ಈ ಅಕ್ಕಿಯಿಂದ ಮಾಡಿದ ದೋಸೆ ಮೃದುವಾಗಿದ್ದು ರುಚಿಕರವಾಗಿರುತ್ತದೆ. ಸೋನಾ ಮಸೂರಿ ಅಥವಾ ಯಾವುದೇ ಉತ್ತಮ ಗುಣಮಟ್ಟದ ಅಕ್ಕಿ ಬಳಸಿದಲ್ಲಿ ದೋಸೆ ಮಾಡಲು ಸುಲಭವಾಗಿರುತ್ತದೆ ಆದರೆ ಅಷ್ಟು ಮೃದುವಾಗಿರುವುದಿಲ್ಲ. ಈ ಸಂದರ್ಭದಲ್ಲಿ ತೆಂಗಿನಕಾಯಿ ಉಪಯೋಗಿಸ ಬಹುದು. ನೀವು ಮೊದಲ ಬಾರಿ ಈ ದೋಸೆ ಪ್ರಯತ್ನಿಸುತ್ತಿದ್ದೀರಾದರೆ ಸೋನಾ ಮಸೂರಿ ಉಪಯೋಗಿಸಿ ಅಥವಾ ದೋಸೆ ಅಕ್ಕಿ ಮತ್ತು ಸೋನಾ ಮಸೂರಿ ಸಮಕ್ಕೆ ಸಮ ಬೆರೆಸಿ. ಈ ದೋಸೆಯನ್ನು ಬಿಸಿ ಯಾಗಿರುವಾಗ ತಿನ್ನಲು ರುಚಿ. ಚಟ್ನೀಕಾಯಿಹಾಲು, ಕಾಯಿಬೆಲ್ಲ, ಸಕ್ಕರೆತುಪ್ಪ, ರಸಾಯನ ಹೀಗೆ ಯಾವುದರೊಟ್ಟಿಗೆ ಬೇಕಾದರೂ ತಿನ್ನ ಬಹುದು.
ದಯವಿಟ್ಟು ಗಮನಿಸಿ, ನೀವು ದೋಸೆ ಅಕ್ಕಿ ಬಳಸುತ್ತೀರಾದರೆ ಸ್ವಲ್ಪ ಕಡಿಮೆ ನೀರು ಸಾಕಾಗುತ್ತದೆ. ಸೋನಾ ಮಸೂರಿ ಅಥವಾ ಬೇರೆ ಒಳ್ಳೆ ಗುಣ ಮಟ್ಟದ ಅಕ್ಕಿ ಬಳಸಿದಲ್ಲಿ ಹೆಚ್ಚು ನೀರು ಸೇರಿಸಬಹುದು.
ನೀರ್ ದೋಸೆಯ ಮೇಲೆ ನಾನು ಒಂದು ವಿಡಿಯೋ ಮಾಡಿದ್ದೇನೆ. ಅದನ್ನು ಈ ಕೆಳಗೆ ನೀವು ವೀಕ್ಷಿಸಬಹುದು.


ತಯಾರಿ ಸಮಯ: 5 ಗಂಟೆ
ಅಡುಗೆ ಸಮಯ: 30 ನಿಮಿಷ
ಪ್ರಮಾಣ : 4 ಜನರಿಗೆ

ಬೇಕಾಗುವ ಪದಾರ್ಥಗಳು: ( ಅಳತೆ ಕಪ್ = 240 ಎಂಎಲ್ )

  1. 2 ಕಪ್ ಅಕ್ಕಿ (ದೋಸೆ ಅಕ್ಕಿ ಆಥವಾ ಸೋನಾ ಮಸೂರಿ)
  2. 1/4 ಕಪ್ ತೆಂಗಿನ ತುರಿ (ಬೇಕಾದಲ್ಲಿ)
  3. 3 - 4 ಕಪ್ ನೀರು (ಅರೆಯುವ ನೀರು ಸೇರಿಸಿ)
  4. ಉಪ್ಪು ರುಚಿಗೆ ತಕ್ಕಷ್ಟು

ನೀರ್ ದೋಸೆ ಮಾಡುವ ವಿಧಾನ:

  1. ನೀರ್ ದೋಸೆ ಮಾಡಲು ಅಕ್ಕಿಯನ್ನು ಕನಿಷ್ಠ 5-6 ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಬೇಕು. ನಾನು ಸಾಮಾನ್ಯವಾಗಿ ಒಂದು ರಾತ್ರಿ ನೆನೆಸುತ್ತೇನೆ. ಮರುದಿನ ಬೆಳಿಗ್ಗೆ ನೀರನ್ನು ಬಗ್ಗಿಸಿ ಮಿಕ್ಸರ್ ಗ್ರೈಂಡರ್ ನಲ್ಲಿ ರುಬ್ಬಿರಿ. ರುಬ್ಬುವ ವೇಳೆ ಹೆಚ್ಚು ನೀರು ಸೇರಿಸಬೇಡಿ. ರುಬ್ಬುವ ಬೇಕಾದಷ್ಟು ನೀರನ್ನು ಮಾತ್ರ ಹಾಕಿ. ಜಾಸ್ತಿ ನೀರು ಹಾಕಿದರೆ ನುಣ್ಣಗೆ ರುಬ್ಬಲು ಸ್ವಲ್ಪ ಕಷ್ಟವಾಗುತ್ತದೆ. ಸೋನಾಮಸೂರಿಯಂಥ ಅಕ್ಕಿ ಆದಲ್ಲಿ ಸ್ವಲ್ಪ ಜಾಸ್ತಿ ಹೊತ್ತು ರುಬ್ಬ ಬೇಕಾಗುತ್ತದೆ. ತೆಂಗಿನ ಕಾಯಿ ಸೇರಿಸುವುದಾದರೆ ಸೇರಿಸಿ. ನೀರ್ ದೋಸೆ ಹಿಟ್ಟು ಬಹಳ ನಯವಾದ ಇರಬೇಕು. 2 ಬೆರಳುಗಳ ನಡುವೆ ಹಿಟ್ಟನ್ನು ಮುಟ್ಟಿ ನೋಡಿದಾಗ ನಯವಾಗಿರಬೇಕು.
  2. ನೀರ್ ದೋಸೆ ಹಿಟ್ಟು ರುಬ್ಬಿಯಾದ ಮೇಲೆ ಒಂದು ಪಾತ್ರೆಗೆ ಹಾಕಿ. ದೋಸೆ ಹಿಟ್ಟು ತೆಳುವಾಗಲು ಸಾಕಷ್ಟು ನೀರು ಸೇರಿಸಿ. ನೀವು ಮೊತ್ತ ಮೊದಲು ಈ ದೋಸೆ ಮಾಡುತ್ತಿರುವಿರಾದರೆ, ಹಿಟ್ಟಿಗೆ ಒಮ್ಮೆಲೇ ತುಂಬಾ ನೀರು ಸೇರಿಸಬೇಡಿ. ದೋಸೆ ಮಾಡಲು ಪ್ರಾರಂಭಿಸಿದ ನಂತರ ಸ್ವಲ್ಪ ಸ್ವಲ್ಪವಾಗಿ ನೀರು ಸೇರಿಸಿ ಹಿಟ್ಟನ್ನು ಸರಿ ಮಾಡಿ ಕೊಳ್ಳ ಬಹುದು. ಈಗ ರುಚಿಗೆ ತಕ್ಕಷ್ಟು ಉಪ್ಪು ಸೇರಿಸಿ ಚೆನ್ನಾಗಿ ಕಲಸಿ.
  3. ಈಗ ಕಬ್ಬಿಣದ ಕಾವಲಿ ಅಥವಾ ನಾನ್ ಸ್ಟಿಕ್ ಪ್ಯಾನ್ ತೆಗೆದುಕೊಂಡು ಒಲೆ ಮೇಲೆ ಇರಿಸಿ, ಒಲೆ ದೊಡ್ಡ ಉರಿಯಲ್ಲಿರಲಿ. ನೀರು ದೋಸೆ ಮಾಡಲು ಕಾವಲಿ ಚೆನ್ನಾಗಿ ಕಾದಿರ ಬೇಕು. ಕಾದಿದೆಯೇ ಎಂದು ತಿಳಿಯಲು ಎರಡು ಹನಿ ನೀರು ಚಿಮುಕಿಸಿ, ಚರ-ಪರ ಸದ್ದಿನೊಂದಿಗೆ ಆವಿಯಾದಲ್ಲಿ ಕಾದಿದೆ ಎಂದರ್ಥ. ಸಣ್ಣ ಈರುಳ್ಳಿ ಅಥವಾ ಒಂದು ಕ್ಯಾರೆಟ್ ಬಳಸಿಕೊಂಡು ಕಾವಲಿಗೆ ಎಣ್ಣೆ ಹಚ್ಚಿ. ಪ್ರತಿ ನೀರ್ ದೋಸೆ ಮಾಡುವ ಮುನ್ನ, ಹಿಟ್ಟನ್ನು ಚೆನ್ನಾಗಿ ಸೌಟಿನಲ್ಲಿ ಬೆರೆಸಿಕೊಳ್ಳ ಬೇಕು. ನೀರ್ ದೋಸೆ ಮಾಡಲು ಬಿಸಿ ಕಾವಲಿ ಮೇಲೆ ದೋಸೆ ಹಿಟ್ಟನ್ನು ಸೌಟಿನಿಂದ ಸುರಿಯಿರಿ. 
  4. ಸುಮಾರು 10 ಸೆಕೆಂಡುಗಳ ಕಾಲ ಮುಚ್ಚಳವನ್ನು ಮುಚ್ಚಿ. ನಂತರ ಮುಚ್ಚಳ ತೆರೆದು, ಉರಿಯನ್ನು ಕಡಿಮೆ ಮಾಡಿ, 5 ಸೆಕೆಂಡುಗಳ ಕಾಲ ಬಿಟ್ಟು, ಜಾಗ್ರತೆಯಿಂದ ದೋಸೆ ಸಟ್ಟುಗ ಉಪಯೋಗಿಸಿ ದೋಸೆಯನ್ನು ತೆಗೆಯಿರಿ. ಪುನಃ ಉರಿಯನ್ನು ಹೆಚ್ಚಿಸಿ. ನೀರ್ ದೋಸೆ ದಪ್ಪ ಎನಿಸಿದರೆ, ಸ್ವಲ್ಪ ನೀರು ಸೇರಿಸಿ. ನೀರ್ ದೋಸೆ ಕಾವಲಿಯಿಂದ ತೆಗೆಯಲು ಕಷ್ಟಸಾಧ್ಯವಾದಲ್ಲಿ, ಸ್ವಲ್ಪ ಅಕ್ಕಿ ಹಿಟ್ಟು ಬೆರೆಸಿ ನಂತರ ಮತ್ತೆ ಪ್ರಯತ್ನಿಸಿ. ಕಾವಲಿ ಮೇಲೆಯೇ ದೋಸೆಯನ್ನು ಮಡಿಸಿ.

ಬುಧವಾರ, ನವೆಂಬರ್ 11, 2015

Radish chutney Recipe in Kannada | moolangi chutney | ಮೂಲಂಗಿ ಚಟ್ನಿ ಮಾಡುವ ವಿಧಾನ

Radish chutney Recipe in Kannada

Radish chutney Recipe in Kannada | moolangi chutney | ಮೂಲಂಗಿ ಚಟ್ನಿ ಮಾಡುವ ವಿಧಾನ 

ಮೂಲಂಗಿ ಚಟ್ನಿಯನ್ನು ಹಸಿ ಮೂಲಂಗಿ, ತೆಂಗಿನ ಕಾಯಿ ಮತ್ತು ಕೆಲವು ಮಸಾಲೆ ಪದಾರ್ಥಗಳನ್ನು ಬಳಸಿ ತಯಾರಿಸಲಾಗುತ್ತದೆ. ಇದೊಂದು ಸರಳ ಅಡುಗೆಯಾಗಿದ್ದು ಬಿಸಿ ಅನ್ನದೊಂದಿಗೆ ತಿನ್ನಲು ಬಲು ರುಚಿ ಮತ್ತು ಸಮಯದ ಅಭಾವವಿರುವಾಗ ಸುಲಭವಾಗಿ ತಯಾರಿಸಬಹುದಾಗಿದೆ.
ಮೂಲಂಗಿಯಲ್ಲಿ ಸಿ ವಿಟಮಿನ್ ಹೇರಳವಾಗಿದ್ದು, ಅನೇಕ ಖಾಯಿಲೆಗಳಿಗೆ ರಾಮಬಾಣವಾಗಿದೆ. ಮೂಲಂಗಿಯ ನಿಯಮಿತ ಸೇವನೆಯು ಮಲಬದ್ದತೆ, ಅರಶಿನ ಕಾಮಾಲೆ, ಅಧಿಕ ರಕ್ತದೊತ್ತಡ, ಮಧುಮೇಹ, ಕ್ಯಾನ್ಸರ್ ಹೀಗೆ ಅನೇಕ ಖಾಯಿಲೆಗಳನ್ನು ದೂರವಿಡಲು ಸಹಕಾರಿಯಾಗಿದೆ. ಬೇರೆ ಚಟ್ನಿಗಳನ್ನು ಓದಲು ಇಲ್ಲಿ ಕ್ಲಿಕ್ಕಿಸಿ. 

ತಯಾರಿ ಸಮಯ: 10 ನಿಮಿಷ
ಅಡುಗೆ ಸಮಯ : 5 ನಿಮಿಷ
ಪ್ರಮಾಣ : 2 ಜನರಿಗೆ

ಪದಾರ್ಥಗಳು: ( ಅಳತೆ ಕಪ್ = 240 ಎಂಎಲ್ )

  1. 1 ಮಧ್ಯಮ ಗಾತ್ರದ ಮೂಲಂಗಿ 
  2. 1-2 ಒಣ ಮೆಣಸಿನಕಾಯಿ 
  3. 1/4 ಟೀಸ್ಪೂನ್ ಕೊತ್ತಂಬರಿ ಬೀಜ 
  4. 1/4 ಕಪ್ ತೆಂಗಿನ ತುರಿ 
  5. ಹುಣಸೆ ಹಣ್ಣು ಒಂದು ಸಣ್ಣ ತುಂಡು 
  6. ಉಪ್ಪು ರುಚಿಗೆ ತಕ್ಕಷ್ಟು.

ಒಗ್ಗರಣೆಗೆ ಬೇಕಾಗುವ ಪದಾರ್ಥಗಳು:

  1. 1/2 ಒಣ ಮೆಣಸಿನಕಾಯಿ 
  2. 1/4 ಟೀಸ್ಪೂನ್ ಸಾಸಿವೆ 
  3. 4 - 5 ಕರಿಬೇವಿನ ಎಲೆ 
  4. 1 ಟೀಸ್ಪೂನ್ ಅಡುಗೆ ಎಣ್ಣೆ

ಮೂಲಂಗಿ ಚಟ್ನಿ ಪಾಕವಿಧಾನ:

  1. ಮೂಲಂಗಿಯನ್ನು ತೊಳೆದು ತುರಿದಿಟ್ಟುಕೊಳ್ಳಿ. 
  2. ಒಂದು ಮಿಕ್ಸಿ ಜಾರ್ ತೆಗೆದುಕೊಂಡು, ತೆಂಗಿನ ಕಾಯಿ, ಒಣ ಮೆಣಸು, ಕೊತ್ತಂಬರಿ ಬೀಜ, ಉಪ್ಪು ಮತ್ತು ಹುಣಿಸೆಹಣ್ಣು ಹಾಕಿ, ಸ್ವಲ್ಪ ನೀರಿನಲ್ಲಿ ರುಬ್ಬಿ ಕೊಳ್ಳಿ. 
  3. ಈಗ ಅದೇ ಮಿಕ್ಸಿ ಜಾರಿಗೆ ತುರಿದ ಮೂಲಂಗಿ ಹಾಕಿ 5 ಸೆಕೆಂಡ್ ಗಳ ಕಾಲ ರುಬ್ಬಿರಿ. 
  4. ರುಬ್ಬಿದ ಚಟ್ನಿಯನ್ನು ಒಂದು ಬಟ್ಟಲಿಗೆ ಹಾಕಿ. ಎಣ್ಣೆ, ಸಾಸಿವೆ, ಮೆಣಸಿನಕಾಯಿ ಮತ್ತು ಕರಿಬೇವಿನ ಒಗ್ಗರಣೆ ಕೊಡಿ. ಬಿಸಿ ಅನ್ನದೊಂದಿಗೆ ಬಡಿಸಿ.
Related Posts Plugin for WordPress, Blogger...